प्रतिनिधी
राज्यातील २९ महानगरपालिकांच्या निवडणुकांचा(Municipal Corporation Election 2026)प्रचार अंतिम टप्प्यात पोहोचलेला असताना, विविध शहरांमध्ये मतदारांना पैसे वाटप केल्याचे कथित आरोप एकामागोमाग समोर येत आहेत. राजकीय पक्षांचे नेते, कार्यकर्ते तसेच अपक्ष उमेदवार एकमेकांवर गंभीर आरोप करत असून, या आरोपांना पुष्टी देणारे व्हिडिओ सोशल मीडियावर मोठ्या प्रमाणावर व्हायरल झाले आहेत. आतापर्यंत किमान ६ ठिकाणांचे ६ व्हिडिओ/क्लिप्स समोर आले आहेत.(Municipal Corporation Election 2026)
कुठे, कुणावर आरोप?
कल्याण–डोंबिवली महापालिका
मनसेच्या स्थानिक नेत्यांनी शिवसेना (शिंदे गट) व भाजप समर्थित कार्यकर्त्यांवर मतदारांना रोख रक्कम वाटप केल्याचा आरोप केला आहे. यासंदर्भातील एक व्हिडिओ समाजमाध्यमांवर प्रसिद्ध करण्यात आला असून, त्यात रात्रीच्या सुमारास पैसे वाटप सुरू असल्याचा दावा करण्यात आला आहे.
नवी मुंबई महापालिका (कोपरखैरणे/तुर्भे परिसर)
राष्ट्रवादी काँग्रेस (शरद पवार गट) ने भाजपवर पैसे वाटपाचा आरोप करत पत्रकार परिषदेत एक व्हिडिओ सादर केला. भाजपकडून हे आरोप फेटाळण्यात आले असून, “अधिकृत तक्रारच नाही” असा प्रतिवाद करण्यात आला आहे.
पुणे महापालिका (बाणेर–बालेवाडी प्रभाग)
काँग्रेस व राष्ट्रवादी (शरद पवार गट) यांनी भाजप उमेदवाराच्या समर्थकांवर मतदारांना पैसे देत असल्याचा आरोप केला. या प्रकरणाचा व्हिडिओ व्हायरल झाल्यानंतर निवडणूक यंत्रणा व पोलिसांनी चौकशी सुरू केली आहे.
सांगली–मिरज महापालिका
येथे शिवसेना (उद्धव ठाकरे गट) ने भाजप व स्थानिक आघाडीवर पैसे वाटपाचा आरोप केला. कार्यकर्त्यांमध्ये थेट वाद, गोंधळ झाल्याचे व्हिडिओ समोर आले असून वातावरण चिघळलेले दिसले.
लातूर महापालिका
भाजपने स्थानिक काँग्रेस उमेदवाराच्या समर्थकांवर पैसे वाटप केल्याचा आरोप केला आहे. यासंदर्भातील एक क्लिप सोशल मीडियावर फिरत असून, काँग्रेसकडून आरोप निराधार असल्याचे सांगण्यात आले आहे.
छत्रपती संभाजीनगर (औरंगाबाद) महापालिका – बेगमपुरा भाग
एमआयएमने भाजप व मित्रपक्षांवर मतदारांना पैसे देऊन प्रभाव टाकण्याचा आरोप केला आहे. बेगमपुरा भागातील हा व्हिडिओ मोठ्या प्रमाणावर व्हायरल झाला आहे.(Municipal Corporation Election 2026)
प्रशासन सतर्क
सर्वच प्रकरणांमध्ये निवडणूक आयोग, रिटर्निंग ऑफिसर आणि पोलीस यंत्रणा सतर्क झाली असून, अधिकृत तक्रार, पंचनामे व चौकशी सुरू आहे. काही ठिकाणी तक्रार नसल्यामुळे व्हिडिओंची सत्यता तपासली जात असून, दोष सिद्ध झाल्यास कठोर कारवाईचे संकेत प्रशासनाने दिले आहेत.
दरम्यान, आरोप-प्रत्यारोप आणि व्हायरल व्हिडिओंमुळे निवडणूक वातावरण तापले असून, मतदानाच्या अवघ्या काही तास आधी पैसे वाटपाचा मुद्दा प्रचाराच्या केंद्रस्थानी आला आहे.(Municipal Corporation Election 2026)
हेही पहा –
Join Our WhatsApp Community