India New Zealand FTA : पंतप्रधान मोदी आणि न्यूझीलंडचे पंतप्रधान लक्सन यांच्यात दूरध्वनीवरून संवाद; ५ वर्षांत द्विपक्षीय व्यापार दुप्पट होणार

जागतिक व्यापाराच्या पटलावर भारताने (India) एक मोठी मजल मारली आहे. पंतप्रधान नरेंद्र मोदी आणि न्यूझीलंडचे (New Zealand) पंतप्रधान क्रिस्टोफर लक्सन यांनी एका विशेष दूरध्वनी संभाषणादरम्यान दोन्ही देशांमधील ‘मुक्त व्यापार करारावर’ (FTA) शिक्कामोर्तब केले आहे. हा करार केवळ ९ महिन्यांच्या विक्रमी वेळेत पूर्ण झाला असून, यामुळे दोन्ही देशांमधील आर्थिक आणि धोरणात्मक संबंध अधिक दृढ होणार आहेत. हा करार भारतासाठी गेल्या काही वर्षांतील सातवा मोठा व्यापारी विजय ठरला आहे. (India New Zealand FTA)

(हेही वाचा – Suryakumar Yadav : गिल नंतर आता सुर्यकुमार यादवलाही सज्जड इशारा ?)

व्यापाराचे उद्दिष्ट आणि गुंतवणूक
या ऐतिहासिक करारामुळे भारत आणि न्यूझीलंडमधील द्विपक्षीय व्यापार पुढील पाच वर्षांत दुप्पट करण्याचे उद्दिष्ट ठेवण्यात आले आहे. न्यूझीलंडने पुढील १५ वर्षांत भारतामध्ये २० अब्ज डॉलर्सची (20 Billion Dollars) गुंतवणूक करण्याचे मान्य केले आहे. ही गुंतवणूक प्रामुख्याने शेती, अन्न प्रक्रिया, तंत्रज्ञान, शिक्षण आणि स्टार्टअप्स (Startups) यांसारख्या महत्त्वाच्या क्षेत्रांमध्ये केली जाणार आहे. यामुळे भारतीय बाजारपेठेत परकीय गुंतवणुकीचा ओघ वाढणार आहे.

भारतीय निर्यातदारांना मोठा फायदा
या करारामुळे भारतीय निर्यातदारांना न्यूझीलंडच्या बाजारपेठेत शुल्कमुक्त प्रवेश (Duty-free access) मिळणार आहे. विशेषतः वस्त्रोद्योग, औषधनिर्माण (Pharmaceuticals), चामड्याच्या वस्तू, रसायने आणि अभियांत्रिकी क्षेत्रातील वस्तूंना न्यूझीलंडमध्ये मोठी मागणी निर्माण होईल. याउलट, भारताने आपल्या संवेदनशील कृषी क्षेत्राचे, विशेषतः दुग्धव्यवसायाचे (Dairy Sector) संरक्षण करत हा समतोल करार साधला आहे. यामुळे भारतीय शेतकरी आणि स्थानिक उद्योगांचे हित जपले गेले आहे.

(हेही वाचा – आता बागेत फुलणार ‘Mr. Gadkari’ गुलाब! नागपुरातील तज्ज्ञाने केली नवी जात विकसित )

तरुणांसाठी रोजगाराच्या संधी
हा करार केवळ व्यापारापुरता मर्यादित नसून तरुणांसाठी देखील फायदेशीर आहे. भारतीय विद्यार्थी आणि व्यावसायिकांसाठी व्हिसा (Visa) प्रक्रिया अधिक सुलभ करण्यात आली आहे. विशेषतः माहिती तंत्रज्ञान (IT), आरोग्य सेवा आणि शिक्षण क्षेत्रात काम करणाऱ्या भारतीय तरुणांना न्यूझीलंडमध्ये रोजगाराच्या नवीन संधी उपलब्ध होतील. तसेच, दोन्ही देशांमधील शैक्षणिक देवाणघेवाण वाढल्यामुळे संशोधनालाही मोठी चालना मिळणार आहे.

हेही पहा –