Mumbai Crime : ६० लाखांचे दागिने लांबवण्यासाठी रचले अपघाताचे नाटक; डिलिव्हरी बॉयसह दोघे गजाआड

मुंबई

अंधेरी (पूर्व) येथील एमआयडीसी परिसरातील एका ज्वेलरी मॅन्युफॅक्चरिंग युनिटमधील ६० लाख रुपयांचे सोन्याचे दागिने लंपास करण्यासाठी एका डिलिव्हरी बॉयने चक्क अपघाताचा बनाव रचल्याचा धक्कादायक प्रकार समोर आला आहे. एमआयडीसी पोलिसांनी या प्रकरणी अविनाश कदम (२६) आणि त्याचा साथीदार मनोज जोगदंडे (४१) या दोघांना अटक केली आहे. पोलिसांनी चोरीचा सर्व मुद्देमाल हस्तगत केला आहे.(Mumbai Crime)

तक्रारदार कांचन पवार (४६), ज्या ‘गोल्ड स्टार एलिट ज्वेलर्स’मध्ये इन्व्हेंटरी प्रमुख आहेत, त्यांनी दिलेल्या तक्रारीनुसार, ६ जून रोजी आरोपी अविनाश कदम याला ग्राहकापर्यंत ६० लाखांचे दागिने पोहोचवण्याचे काम देण्यात आले होते. मात्र, दागिने घेऊन निघालेला कदम परतलाच नाही. काही वेळाने त्याने अपघाताचे नाटक करत, आपण भांगरगल्ली येथे टेम्पोला धडकून बेशुद्ध पडल्याचे आणि दागिने चोरीला गेल्याचे भासवले.(Mumbai Crime)

कदमने अत्यंत शिताफीने वैद्यकीय मदतीचे नाटक केले. अंतर्गत दुखापत झाल्याचे सांगून त्याने वारंवार रुग्णालयात दाखल राहण्याचा आणि विविध चाचण्यांचा आग्रह धरला. मात्र, तपासणीदरम्यान तो पूर्णपणे स्थिर असल्याचे आणि त्याला कोणतीही दुखापत झाली नसल्याचे डॉक्टरांनी सांगितल्याने पोलिसांचा संशय बळावला.(Mumbai Crime)

(हेही वाचा – NEET-UG 2026 फेरपरीक्षा देणाऱ्या विद्यार्थ्यांसाठी २१ जूनचा मेगाब्लॉक रद्द, रेल्वेसेवा अखंडित सुरू )

एमआयडीसी पोलिसांनी परिसरातील सीसीटीव्ही फुटेज तपासले असता, कदमने स्वतःहून अपघाताचा कट रचल्याचे स्पष्ट झाले. तपासादरम्यान पोलिसांनी कदमचा साथीदार मनोज जोगदंडे याचा शोध घेतला. जोगदंडे हा सराईत गुन्हेगार असून यापूर्वीही तो फसवणुकीच्या गुन्ह्यात अडकला असल्याचे समोर आले. पोलिसांनी जोगदंडेला ताब्यात घेताच त्याने गुन्ह्याची कबुली दिली.(Mumbai Crime)

पोलिसांनी जोगदंडेची कसून चौकशी केली असता, चोरीचा संपूर्ण ऐवज त्याच्याकडून जप्त करण्यात आला. धक्कादायक बाब म्हणजे, आरोपींनी हा मुद्देमाल लपवण्यासाठी शक्कल लढवली होती. त्यांनी काही दागिने स्कूटरच्या डिक्कीत, काही घराच्या छतावर तर उर्वरित दागिने एका फुलदाणीमध्ये लपवून ठेवले होते.(Mumbai Crime)

डीसीपी दत्ता नलावडे यांच्या मार्गदर्शनाखाली एसीपी गजानन पवार, वरिष्ठ निरीक्षक रवींद्र वाणी, निरीक्षक महेश गुरव, उपनिरीक्षक किरण परबत आणि त्यांच्या पथकाने ही कारवाई केली. सीसीटीव्ही फुटेज आणि तांत्रिक पुराव्यांच्या आधारे पोलिसांनी अवघ्या काही तासांत या गुन्ह्याचा छडा लावला.(Mumbai Crime)

हेही पहा –