-
विशेष प्रतिनिधी
शालेय शिक्षण क्षेत्रात क्रांती घडवून आणण्यासाठी महाराष्ट्र सरकारने एक महत्त्वाचे पाऊल उचलले आहे. राज्यातील शिक्षकांना कृत्रिम बुद्धिमत्ता (AI) आणि आधुनिक डिजिटल तंत्रज्ञानाशी जोडण्यासाठी शालेय शिक्षण विभाग आणि ‘गुगल फॉर एज्युकेशन’ यांच्यात एक महत्त्वपूर्ण करार करण्यात आला आहे. या उपक्रमामुळे राज्यातील चार लाखांहून अधिक शिक्षक भविष्यातील शिक्षण पद्धतीसाठी सज्ज होणार आहेत.
मंत्रालयात पार पडलेल्या या विशेष कार्यक्रमात, शालेय शिक्षण मंत्री दादाजी भुसे (Dadaji Bhuse) यांच्या उपस्थितीत या करारावर स्वाक्षऱ्या करण्यात आल्या. या उपक्रमाचे सर्वात महत्त्वाचे वैशिष्ट्य म्हणजे, हे प्रशिक्षण पूर्णपणे विनामूल्य असणार असून, राज्य शासनावर याचा कोणताही आर्थिक भार पडणार नाही. पुढील दीड वर्षांच्या कालावधीत ‘गुगल एआय एज्युकेटर सिरीज’च्या माध्यमातून हे प्रशिक्षण टप्प्याटप्प्याने दिले जाणार आहे. प्रारंभी मास्टर ट्रेनर्सना प्रशिक्षित केले जाईल आणि त्यानंतर हे प्रशिक्षक राज्यभरातील इतर शिक्षकांपर्यंत ज्ञानाचे जाळे विस्तारतील, अशी योजना आखण्यात आली आहे.
(हेही वाचा – Ram Mandir, Ayodhya: रामललाचा रत्नजडित हार, चरणपादुकांची चोरी; एसआयटी ट्रस्टशी संबंधित व्यक्तिंची चौकशी)
या प्रशिक्षणाद्वारे शिक्षकांना केवळ एआय (AI) साक्षरच केले जाणार नाही, तर मराठी, हिंदी आणि इंग्रजी अशा विविध भाषांमधील स्थानिकीकृत शैक्षणिक सामग्रीचा वापर करून डिजिटल सुरक्षिततेसह आधुनिक साधनांचे अध्यापनात कौशल्यपूर्ण वापर कसे करावे, याचे धडे दिले जातील. राष्ट्रीय शैक्षणिक धोरण २०२० च्या ध्येयांशी सुसंगत असलेला हा उपक्रम राज्यातील शाळांमध्ये स्मार्ट क्लासरूम्स, डिजिटल लायब्ररी आणि प्रगत आयसीटी लॅब्सना अधिक बळकटी देणार आहे.
शिक्षकांचा व्यावसायिक विकास आणि विद्यार्थ्यांना जागतिक दर्जाचे शिक्षण देण्याच्या दृष्टीने हा करार मैलाचा दगड ठरणार असल्याचे मत शिक्षण राज्यमंत्री डॉ. पंकज भोयर (Dr. Pankaj Bhoyar) यांनी व्यक्त केले. या संपूर्ण प्रशिक्षण प्रक्रियेवर महाराष्ट्र शासनाचे थेट नियंत्रण राहणार असून, या उपक्रमामुळे राज्यातील शिक्षण व्यवस्था जागतिक दर्जाच्या तंत्रज्ञानाशी थेट जोडली जाणार आहे.
हेही पहा –
Join Our WhatsApp Community