सानिया मिर्झाची निवृत्तीची घोषणा; ‘इथे’ खेळणार शेवटचा सामना

मागच्या 20 वर्षांपासून अनेकांसाठी आदर्श असलेल्या सानिया मिर्झाने आपली व्यावसायिक कारकीर्द संपवण्याची घोषणा केली आहे. 19 फेब्रुवारीपासूनच सुरु होणा-या WTA 1000 स्पर्धेतील दुबई टेनिस चॅम्पियनशिनपमध्ये सानिया आपला शेवटचा सामना खेळणार आहे.

सानिया मिर्झाची यशस्वी कारकीर्द

सानिया मिर्झाने आपल्या कारकिर्दीत दुहेरीमध्ये 6 वेळा ग्रॅंडस्लॅम विजेतेपद पटकावले आहे. तसेच, दुहेरीत प्रथम क्रमांकाचे मानांकन मिळवण्याचा मानही मिळवला होता. महिला एकेरीत तिची सर्वोत्तम रॅंकिंग 27 आहे. यूएस ओपनची चौथी फेरी गाठल्यानंतर 2005 मध्ये सानियाने हे मानांकन मिळवले होते. 2009 मध्ये ऑस्ट्रेलियन ओपनच्या मिश्र दुहेरीत तिने पहिल्यांदा यश मिळवले.