ट्रू- व्होटर मोबाईल ॲपमध्ये नाव शोधा आणि हरकती नोंदवा

राज्यातील विविध महानगरपालिकांच्या सार्वत्रिक निवडणुकांसाठी प्रभागनिहाय प्रारूप मतदार याद्या प्रसिद्ध करण्यात आल्या असून त्यातील मतदारांची नावे तपासण्याची आणि हरकती दाखल करण्याची सुविधा ट्रू- व्होटर मोबाईल ॲपद्वारे उपलब्ध करून देण्यात आल्याची माहिती राज्य निवडणूक आयुक्त यू. पी. एस. मदान यांनी दिली आहे. त्यामुळे या ॲपद्वारे आपण आपले मतदार यादीतील नाव पाहून त्यावरील हरकत नोंदवू शकता.

( हेही वाचा : ऑगस्ट क्रांतीकडे जाणाऱ्या सर्व मार्गांच्या पदपथांचे नुतनीकरण; देखभालीसाठी तीन वर्षांचे कंत्राट, मोजणार अतिरिक्त २ कोटी रुपये)

मुंबई, ठाणे, नवी मुंबई, कल्याण- डोंबिवली, उल्हासनगर, वसई- विरार, पुणे, पिंपरी- चिंचवड, सोलापूर, कोल्हापूर, नाशिक, अकोला, अमरावती आणि नागपूर महानगरपालिकेच्या सार्वत्रिक निवडणुकांसाठी प्रभागनिहाय प्रारूप मतदार याद्या प्रसिद्ध करण्यात आल्या आहेत. त्यासाठी भारत निवडणूक आयोगाने तयार केलेल्या व ३१ मे २०२२ रोजी अस्तित्वात आलेल्या विधानसभा मतदारसंघाच्या मतदार याद्या ग्राह्य धरण्यात आल्या आहेत. त्यावर १ जुलै २०२२ पर्यंत हरकती व सूचना दाखल करता येतील.

प्रभागनिहाय प्रारूप मतदार याद्या संबंधित महानगरपालिकेत किंवा त्यांच्या संकेतस्थळावर उपलब्ध आहेत. त्यात आपले नाव तपासता येईल. ती सुविधा आता ट्रू- व्होटर मोबाईल ॲपमध्येही उपलब्ध करून देण्यात आली आहे. विधानसभा मतदारसंघाची यादी प्रभागनिहाय विभाजित करताना त्यात नवीन नावांचा समावेश करणे किंवा नावे वगळण्याचा राज्य निवडणूक आयोगाला अधिकार नाही. एखाद्या मतदारास चुकीचा प्रभाग वाटप झाल्यास किंवा विधानसभेच्या मतदार यादीत नाव असूनही महानगरपालिकेच्या मतदार यादीत नाव नसल्यास, हरकत दाखल करता येते. या हरकतींचा लवकर निपटारा होण्याच्या दृष्टीने राज्य निवडणूक आयोगाने एक नमुना अर्ज तयार केला आहे. त्याद्वारे आपण हरकत घेऊ शकतो आणि ट्रू- व्होटर मोबाईल ॲपद्वारेही सोप्या पद्धतीने हरकत दाखल करता यते, असेही मदान यांनी सांगितले.

मतदार यादीतील हरकती व सूचनांसाठी ११ जुलैपर्यंत मुदत वाढवून द्या

प्रारुप मतदार यादीवर सूचना व हरकती दाखल करण्याकरता १ जुलैपर्यंत मुदत देण्यात आली आहे. परंतु या कालावधीमध्ये वाढ करुन देण्याची मागणी भाजपने केली आहे. ही मुदत ११ जुलै २०२२ पर्यंत वाढवून देण्याची मागणी भाजपचे माजी गटनेते प्रभाकर शिंदे यांनी राज्य निवडणूक आयोग तसेच मुंबइर महापालिकेचे आयुक्त तथा प्रशासकाकडे केली आहे.