-
प्रतिनिधी
Jishnu Dev Varma : समाजातील प्रत्येक घटकाला सन्मानाने जगण्याचा आणि प्रगतीची शिखरे पादाक्रांत करण्याचा समान हक्क आहे. मात्र, आजही अनेकदा दिव्यांग बांधवांकडे केवळ मदतीच्या किंवा सहानुभूतीच्या भावनेने पाहिले जाते. ही मानसिकता बदलणे काळाची गरज असून, त्यांच्यातील उणिवा शोधण्यापेक्षा त्यांच्या अद्वितीय क्षमता, असामान्य प्रतिभा आणि दुर्दम्य इच्छाशक्तीला वाव देणे गरजेचे आहे. ‘विकसित भारत @२०४७’चे स्वप्न साकार करायचे असेल तर देशाच्या विकास प्रवासात समाजातील प्रत्येक घटकाचा सक्रिय आणि समान सहभाग अत्यंत महत्त्वाचा ठरतो.
(हेही वाचा – IPL 2027 : पुढील वर्षी आयपीएलचं २० वं पर्व; होणार मोठा सोहळा )
याच अनुषंगाने, दिव्यांगांचे कल्याण केवळ औपचारिक मदतीपुरते मर्यादित न ठेवता त्यांचे सर्वांगीण सक्षमीकरण आणि सामाजिक समावेशन साधले पाहिजे, यावर भर दिला जात आहे. सार्वजनिक पायाभूत सुविधा अधिकाधिक सुलभ करण्याच्या दृष्टीने शासन स्तरावर धोरणे आखली जात असली, तरी प्रत्यक्षात समाजपरिवर्तनासाठी प्रत्येक नागरिकाचा पुढाकार आवश्यक आहे. सेवा ही निव्वळ एक कृती नसून ती एक वृत्ती आणि सामायिक मानवतेची भावना आहे, ज्यातून दुसऱ्यांचे दुःख समजून घेऊन त्यांना आत्मनिर्भर बनवणे हीच खरी समाजसेवा मानली जाते.
याच उदात्त भावनेतून मुंबईतील वाय. बी. चव्हाण सभागृहात लोकभवन सेवा संकल्प अभियानांतर्गत एका महत्त्वपूर्ण कार्यक्रमाचे आयोजन करण्यात आले होते. या सोहळ्यात राज्यपाल जिष्णु देव वर्मा यांनी “दिव्यांगांसाठी केवळ दया नव्हे, तर समान संधी निर्माण करणे ही समाजाची खरी जबाबदारी आहे,” असे ठाम प्रतिपादन केले. मैत्री पीस फाउंडेशन आणि वर्मा फाउंडेशन यांच्या संयुक्त विद्यमाने आयोजित या सोहळ्यात मान्यवरांच्या हस्ते ११ दिव्यांग व्यक्तींना सन्मानाचे प्रतीक म्हणून मोफत व्हीलचेअरचे वाटप करण्यात आले, तर विविध क्षेत्रांत उल्लेखनीय योगदान देणाऱ्या ३२ मान्यवरांना ‘राष्ट्रीय उत्कृष्टता पुरस्कार’ प्रदान करून गौरविण्यात आले. याप्रसंगी महामंडलेश्वर राजेश ओझा महाराज, वासुमुदुमुरी वर्मा, सुरजित बरुआ, मिलन पारेख, डॉ. प्रशांत नारनवरे, पद्मश्री सोमा घोष आदी मान्यवर मोठ्या संख्येने उपस्थित होते.
हेही पहा –
Join Our WhatsApp Community