Vaibhav Sooryavanshi Brand Value : १५ वर्षांचा वैभव सुर्यवंशी रोज कमावतोय १.५ ते २ कोटी, प्रश्न ब्रँड मागच्या सुरक्षेचा

• ऋजुता लुकतुके

Vaibhav Sooryavanshi Brand Value : भारतीय क्रिकेटमधील युवा फलंदाज वैभव सूर्यवंशीचे नाव आता केवळ मैदानावरील कामगिरीपुरते मर्यादित राहिलेले नाही. अवघ्या १५व्या वर्षी तो मोठ्या ब्रँड्ससाठी आकर्षणाचा केंद्रबिंदू बनला असून, त्याच्या एका दिवसाच्या ब्रँड शूटची किंमत तब्बल १.५ ते २ कोटी रुपये असल्याचे समोर आले आहे. मात्र एवढ्या वेगाने वाढणाऱ्या बाजारमूल्याबरोबरच वैभवच्या व्यावसायिक आणि कायदेशीर संरक्षणाचा प्रश्नही गंभीरपणे उपस्थित झाला आहे.

२०२६च्या आयपीएलमधील (IPL) विक्रमी कामगिरीनंतर वैभवचं ब्रँड मूल्य झपाट्याने वाढलं. त्याने स्पर्धेत ७७६ धावा करत ऑरेंज कॅप पटकावली. त्यामुळे त्याची तुलना भारतीय क्रिकेटमधील मोठ्या नावांशी होऊ लागली. हौलिहान लोकीच्या २०२६च्या आयपीएल मूल्यांकन अहवालात त्याच्या प्रसारणातील आकर्षणाची तुलना थेट सचिन तेंडुलकरच्या (Sachin Tendulkar) लोकप्रियतेशी करण्यात आली आहे. मात्र त्याच वेळी, वैभववर पैसा लावणारे ब्रँड प्रत्यक्षात त्याच्या पुढील दशकभराच्या संभाव्य कामगिरीवर दांव लावत आहेत, असेही या मूल्यांकनातून स्पष्ट होते.

इथेच खरी चिंता निर्माण होते. वैभव अजून १८ वर्षांचा झालेला नाही. त्यामुळे तो स्वतः कायदेशीर करारावर स्वाक्षरी करू शकत नाही. सध्या त्याच्या व्यावसायिक व्यवहारांची जबाबदारी त्याचे कुटुंब सांभाळत आहे. त्याचबरोबर राजस्थान रॉयल्सच्या (Rajasthan Royals) व्यावसायिक व्यवस्थेचेही त्याला मार्गदर्शन मिळत आहे. मात्र त्याच्याकडे अद्याप औपचारिक व्यवस्थापन संस्था किंवा एजंट नाही.

(हेही वाचा – Maharashtra Cabinet Decisions : मसापच्या नाशिक शाखेला भाडेपट्टयाचे मुद्रांक शुल्क माफ)

क्रिकेटमधील युवा प्रतिभांना हाताळण्याचा अनुभव असलेले क्रीडा व्यवस्थापन तज्ज्ञ दास ब्लाह यांच्या मते, सध्या राजस्थान रॉयल्सच्या व्यवस्थेकडून वैभवला योग्य सल्ला मिळत असल्याचे दिसते. मात्र त्याची व्यावसायिक किंमत आणखी वाढली, तर स्वतंत्र आणि व्यावसायिक व्यवस्थापनाची गरज भासू शकते. कारण करारातील अटी, १८ वर्षांचा झाल्यानंतर जुन्या करारांचे काय होणार, चुकीच्या सल्ल्यामुळे आर्थिक नुकसान झाल्यास जबाबदारी कोणाची असेल, यासारखे प्रश्न अद्याप स्पष्ट नाहीत.

वैभवची ब्रँड किंमत पुढील दोन वर्षांत त्याची कामगिरी कायम राहिल्यास आणखी दुप्पट होऊन ३ ते ४ कोटी रुपये प्रतिदिनपर्यंत जाऊ शकते, असा अंदाजही व्यक्त करण्यात आला आहे.

म्हणजेच वैभव सूर्यवंशीसमोर एकीकडे क्रिकेटमधील असामान्य संधी आहेत, तर दुसरीकडे त्याच वेगाने वाढणाऱ्या पैशाचे आणि प्रसिद्धीचे व्यवस्थापन करण्याचे मोठे आव्हान आहे. १५ वर्षांच्या मुलाची किंमत कोट्यवधींमध्ये पोहोचली आहे; आता त्या मुलाच्या हिताचे रक्षण करणारी यंत्रणाही तितकीच मजबूत असणे गरजेचे आहे.

हेही पहा –