-
ऋजुता लुकतुके
Ind A vs SL A, Tri Series : भारत अ आणि श्रीलंका अ यांच्यात दांबुला येथे झालेल्या थरारक सामन्यानंतर युवा फलंदाज वैभव सूर्यवंशी (Vaibhav Sooryavanshi) पुन्हा चर्चेत आला आहे. पण, यावेळी मैदानातील कामगिरीने नाही तर सामन्यानंतर झालेल्या भांडणामुळे. सुपर ओव्हरमध्ये भारत अ संघाचा पराभव झाल्यानंतर वैभव आणि श्रीलंका अ संघातील एका खेळाडूमध्ये मैदानावरच शाब्दिक वाद झाल्याचे पाहायला मिळाले. या घटनेचा व्हिडीओ सोशल मीडियावर वेगाने व्हायरल झाला आहे.
तिरंगी मालिकेतील हा सामना अत्यंत रंगतदार ठरला. दोन्ही संघांनी निर्धारित ५० षटकांत समान धावसंख्या उभारल्याने सामना टाय झाला. त्यानंतर विजेता निश्चित करण्यासाठी सुपर ओव्हर खेळवण्यात आली. सुपर ओव्हरमध्ये श्रीलंका अ संघाने भारत अ वर मात करत विजय मिळवला.
सुपर ओव्हर (Super Over) संपल्यानंतर श्रीलंकेचे खेळाडू मैदानावर विजयाचा जल्लोष करत होते. याचदरम्यान वैभव सूर्यवंशी आणि श्रीलंका अ संघातील एका खेळाडूमध्ये काही शब्दांची देवाणघेवाण झाली. सुरुवातीला हा हलकाफुलका संवाद वाटत असला तरी काही क्षणांत दोघेही एकमेकांसमोर उभे ठाकल्याचे दिसले.
स्थिती अधिक चिघळण्यापूर्वी पंच आणि दोन्ही संघांतील खेळाडूंनी हस्तक्षेप करत दोघांना वेगळे केले. त्यामुळे कोणताही मोठा वाद किंवा अनुचित प्रकार घडला नाही. मात्र मैदानावरील हा प्रसंग कॅमेऱ्यात कैद झाला आणि त्यानंतर त्याची सोशल मीडियावर मोठी चर्चा सुरू झाली.
(हेही वाचा – Panchang 16 June 2026 : आजचे पंचांग, शुभ मुहूर्त आणि राशीभविष्य; जाणून घ्या कसा असेल तुमचा दिवस)
Vaibhav got into a heated argument with Sri Lankan players after the super over pic.twitter.com/wnGyEF6Nvw
— Abhi (@AbhiMSD_07) June 15, 2026
Vaibhav Sooryavanshi in fight pic.twitter.com/cNAbDrJ6gV
— Infino Sports (@infinosports) June 15, 2026
Heated Moment between Vaibhav Sooryavanshi and Sri Lanka A Team after Super over 😦 pic.twitter.com/DXRyEiSJWn
— Ajay Jadeja (@AjayJadeja171) June 15, 2026
वैभव सूर्यवंशी हा भारतीय क्रिकेटमधील सर्वात आश्वासक युवा खेळाडूंमध्ये गणला जातो. आक्रमक फलंदाजी आणि आत्मविश्वासपूर्ण देहबोलीमुळे तो नेहमीच चर्चेत असतो. मात्र या सामन्यानंतर त्याच्या आक्रमक स्वभावाची दुसरी बाजूही चाहत्यांना पाहायला मिळाली.
सामन्याच्या तणावपूर्ण वातावरणामुळे आणि पराभवाच्या निराशेमुळे हा वाद झाल्याचे मानले जात आहे. सुपर ओव्हरमध्ये भारत अ संघाला विजयासाठी १७ धावांची गरज होती, मात्र संघ लक्ष्य गाठू शकला नाही. त्यामुळे भारतीय खेळाडूंमध्ये निराशा स्पष्टपणे दिसून येत होती.
दरम्यान, या घटनेबाबत अधिकृतरीत्या कोणतीही शिस्तभंगाची कारवाई जाहीर करण्यात आलेली नाही. सामना संपल्यानंतर दोन्ही संघांनी परिस्थिती शांतपणे हाताळल्याचेही सांगितले जात आहे.
तथापि, क्रिकेटला ‘जेंटलमन गेम’ म्हटले जात असले तरी उच्चस्तरीय स्पर्धांमध्ये भावना अनावर होण्याच्या घटना अधूनमधून घडत असतात. वैभव सूर्यवंशी आणि श्रीलंकेच्या खेळाडूमधील हा वादही अशाच तणावपूर्ण क्षणांचा परिणाम मानला जात असून, त्याचा व्हिडीओ सध्या क्रिकेटविश्वात चर्चेचा विषय ठरला आहे.
हेही पहा –
Join Our WhatsApp Community