-
ऋजुता लुकतुके
Harsh Singh Judo Gold : ग्लासगो येथे सुरू असलेल्या राष्ट्रकुल स्पर्धा २०२६मध्ये भारताच्या ज्युदोकांनी इतिहास रचला आहे. अस्मिता डे आणि हर्ष सिंह यांनी आपल्या गटात सुवर्णपदके जिंकत भारताला एकाच दिवशी दोन सुवर्णपदकांची ऐतिहासिक कमाई करून दिली. भारतीय ज्युदोच्या इतिहासातील हा एक महत्त्वाचा टप्पा मानला जात आहे.
महिलांच्या ४८ किलो वजनी गटात अस्मिता डे हिने अत्यंत चुरशीच्या अंतिम सामन्यात प्रतिस्पर्ध्यावर मात करत सुवर्णपदक पटकावले. सामना गोल्डन स्कोअरपर्यंत गेला आणि निर्णायक क्षणी अस्मिताने संयम राखत विजय मिळवला. राष्ट्रकुल स्पर्धेत सुवर्णपदक जिंकणारी ती पहिली भारतीय महिला जुडोपटू ठरली.
यानंतर पुरुषांच्या ६० किलो वजनी गटात हर्ष सिंहने ऑस्ट्रेलियाच्या अनुभवी आणि ऑलिम्पिकमध्ये खेळलेल्या जोशुआ कॅट्झचा पराभव करत सुवर्णपदक जिंकले. शेवटच्या क्षणापर्यंत रंगलेल्या या लढतीत हर्षने वाझा-अरी गुणांच्या जोरावर विजय मिळवला. या कामगिरीमुळे तो राष्ट्रकुल स्पर्धेत सुवर्णपदक जिंकणारा पहिला भारतीय पुरुष ज्युदोपटू ठरला.
(हेही वाचा – Vande Bharat Heart Transplant : वंदे भारतमधून प्रथमच मानवी ह्रदयाची वाहतूक, सुरत ते अहमदाबाद काही तासांतच, रुग्णाला मिळाले नवीन जीवन )
या दोन सुवर्णपदकांमुळे भारताच्या पदकतालिकेत मोठी भर पडली असून, भारतीय जुडोला जागतिक स्तरावर नवी ओळख मिळाली आहे. याआधी भारताला राष्ट्रकुल स्पर्धेत जुडोमध्ये पदके मिळाली होती, मात्र एकाच स्पर्धेत दोन सुवर्णपदकांचा पराक्रम प्रथमच घडला आहे.
पंतप्रधान नरेंद्र मोदी यांनीही या ऐतिहासिक कामगिरीबद्दल दोन्ही खेळाडूंचे अभिनंदन केले. त्यांनी सोशल मीडियावर संदेश देताना भारतीय जुडोसाठी हा ‘ऐतिहासिक दिवस’ असल्याचे म्हटले. देशभरातून अस्मिता डे आणि हर्ष सिंह यांच्यावर कौतुकाचा वर्षाव होत आहे.
भारतीय ऑलिम्पिक संघटनेनेही दोन्ही खेळाडूंच्या कामगिरीचे कौतुक करत ही कामगिरी भारतीय क्रीडा इतिहासातील महत्त्वाची उपलब्धी असल्याचे म्हटले आहे. या यशामुळे भारताच्या युवा जुडोपटूंना मोठी प्रेरणा मिळाली असून, आगामी आशियाई स्पर्धा आणि ऑलिम्पिकसाठी भारतीय जुडोकडून अपेक्षा उंचावल्या आहेत.
राष्ट्रकुल स्पर्धेतील या ऐतिहासिक डबल गोल्डमुळे भारताने ज्युदोमध्ये नवे पर्व सुरू केल्याची भावना क्रीडाविश्वात व्यक्त केली जात आहे.
हेही पहा –
Join Our WhatsApp Community