Anand Mahindra on CWG 2026 : भारताच्या राष्ट्रकूल यशावर आनंद महिंद्रा यांची कौतुकाची थाप, ‘३९’ पदकांचं मोल खूप मोठं

• ऋजुता लुकतुके

Anand Mahindra on CWG 2026 : ग्लासगो येथे झालेल्या २०२६ राष्ट्रकुल क्रीडा स्पर्धेत भारताने ३९ पदके जिंकून पदकतालिकेत चौथे स्थान मिळवल्यानंतर उद्योगपती आनंद महिंद्रा यांनी भारतीय खेळाडूंच्या कामगिरीचे जोरदार कौतुक केले आहे. सोशल मीडियावर प्रतिक्रिया देताना महिंद्रा यांनी म्हटले की, भारताने मिळवलेल्या या ३९ पदकांचे मूल्य केवळ संख्येवरून मोजता येणार नाही. यंदाच्या स्पर्धेत भारताला पारंपरिकरित्या मोठ्या प्रमाणात पदके मिळवून देणारे अनेक खेळ स्पर्धेत नसतानाही भारतीय खेळाडूंनी उल्लेखनीय कामगिरी केली आहे.

महिंद्रा यांनी विशेषत्वाने नमूद केले की, हॉकी, बॅडमिंटन आणि कुस्ती यांसारखे भारताचे बलस्थान मानले जाणारे खेळ यंदाच्या राष्ट्रकुल स्पर्धेत समाविष्ट नव्हते. त्यामुळे भारतासमोर मोठे आव्हान होते. अशा परिस्थितीत भारतीय खेळाडूंनी बॉक्सिंग, अॅथलेटिक्स, पॅरा-अॅथलेटिक्स, वेटलिफ्टिंग आणि ज्युडो या खेळांमध्ये दमदार कामगिरी करत देशाला चौथ्या स्थानावर पोहोचवले. त्यामुळे ही कामगिरी अधिक महत्त्वाची ठरते, असे त्यांनी म्हटले.

ग्लासगो स्पर्धेत भारताने १३ सुवर्ण, १७ रौप्य आणि ९ कांस्य अशी एकूण ३९ पदके जिंकली. भारतीय बॉक्सिंग संघाने ऐतिहासिक कामगिरी करत सात सुवर्ण आणि तीन रौप्य पदके मिळवली. अॅथलेटिक्स आणि पॅरा-अॅथलेटिक्समध्येही भारतीय खेळाडूंनी अनेक उल्लेखनीय यश मिळवले. विशेष म्हणजे ३८ भारतीय खेळाडूंनी किमान एक पदक जिंकले असून, गुलवीर सिंग दोन पदके जिंकणारा एकमेव भारतीय ठरला.

(हेही वाचा – Mumbai: काजू कतलीमध्ये स्टेपलरची पिन सापडली, मुंबईतील बड्या मिठाईवाल्यावर मोठी कारवाई; दुकानमालकाचा परवाना निलंबित )

महिंद्रा यांनी भारतीय खेळाडूंच्या सातत्यपूर्ण प्रगतीचेही कौतुक केले. प्रत्येक मोठ्या स्पर्धेनंतर भारतीय खेळाडू नवे मानदंड प्रस्थापित करत आहेत. भारताची स्पर्धात्मक क्षमता आता केवळ काही मोजक्या खेळांपुरती मर्यादित राहिलेली नाही, तर विविध क्रीडा प्रकारांमध्ये देश सातत्याने प्रगती करत आहे, असे त्यांनी नमूद केले.

त्यांच्या मते, ग्लासगोतील ही कामगिरी २०३० मध्ये अहमदाबाद येथे होणाऱ्या राष्ट्रकुल स्पर्धेच्या तयारीसाठी अत्यंत उत्साहवर्धक आहे. भारताने आता बहुखेळ शक्ती म्हणून स्वतःची ओळख अधिक मजबूत करावी, असा संदेश त्यांनी दिला.

महिंद्रा यांच्या प्रतिक्रियेनंतर सोशल मीडियावर भारतीय खेळाडूंच्या कामगिरीचे मोठ्या प्रमाणात कौतुक होत आहे. पदकसंख्येपेक्षा विविध खेळांमध्ये मिळवलेले यश, नव्या खेळाडूंची कामगिरी आणि कठीण परिस्थितीत केलेली उत्कृष्ट कामगिरी हेच भारताच्या क्रीडा भवितव्याचे खरे बलस्थान असल्याचे त्यांच्या वक्तव्यातून अधोरेखित झाले आहे.

हेही पहा –