Ajinkya Rahane Retirement : रहाणेच्या निवृत्तीमुळे केकेआरसमोर नेतृत्वाचे मोठे संकट; आयपीएल २०२७ लिलाव ठरणार निर्णायक

• ऋजुता लुकतुके

Ajinkya Rahane Retirement : भारतीय क्रिकेटमधील अनुभवी फलंदाज अजिंक्य रहाणे याच्या निवृत्तीनंतर कोलकाता नाईट रायडर्स (KKR) संघासमोर मोठे नेतृत्व संकट उभे राहिले आहे. आयपीएल २०२७ हंगामासाठी आता केकेआरला नव्या कर्णधाराचा शोध घ्यावा लागणार असून, आगामी आयपीएल लिलाव हा या प्रश्नाचे उत्तर ठरू शकतो, अशी चर्चा सुरू झाली आहे.

रहाणेने सर्व प्रकारच्या क्रिकेटमधून निवृत्ती घेतल्यामुळे केकेआरचं नेतृत्व अचानक ओकंबोकं झालं आहे. आयपीएल २०२५मध्ये श्रेयस अय्यरच्या (Shreyas Iyer) जागी रहाणेकडे कर्णधारपदाची जबाबदारी देण्यात आली होती, तर २०२६ हंगामातही तो संघाचा प्रमुख नेता होता. त्याच्या शांत स्वभावामुळे, अनुभवी दृष्टिकोनामुळे आणि दबावाच्या परिस्थितीत योग्य निर्णय घेण्याच्या क्षमतेमुळे केकेआर व्यवस्थापनाचा त्याच्यावर मोठा विश्वास होता.

रहाणेने २०२६च्या हंगामात १४ सामन्यांत ३३५ धावा केल्या आणि फलंदाज तसेच नेता म्हणून महत्त्वाची भूमिका बजावली. मात्र त्याच्या निवृत्तीमुळे केकेआरच्या सध्याच्या संघात स्पष्ट कर्णधार पर्याय दिसत नसल्याचे मानले जात आहे.

संघातील रिंकू सिंग, सुनील नारायण, वरुण चक्रवर्ती, हर्षित राणा आणि अंगकृष रघुवंशी हे महत्त्वाचे खेळाडू असले, तरी त्यांच्यापैकी कोणाकडेही आयपीएल स्तरावरील दीर्घकालीन नेतृत्वाचा अनुभव नाही. विशेषतः नारायण हा संघाचा वरिष्ठ खेळाडू असला, तरी तो पूर्णवेळ कर्णधारपदाचा पर्याय ठरेल का, याबाबत प्रश्नचिन्ह आहे.

(हेही वाचा – अमेरिकेत F-35B स्टील्थ जेट क्रॅश; पायलटचा एअर-इजेक्ट होऊन जीव वाचला!)

यामुळे आयपीएल २०२७ लिलावात केकेआर अनुभवी भारतीय कर्णधार किंवा आंतरराष्ट्रीय नेतृत्वाचा अनुभव असलेल्या खेळाडूवर मोठी बोली लावू शकतो, अशी शक्यता व्यक्त केली जात आहे. संघ व्यवस्थापनाला आता केवळ फलंदाज किंवा गोलंदाज नव्हे, तर संघाला दीर्घकाळ दिशा देऊ शकणारा नेता शोधावा लागणार आहे.

रहाणेच्या निवृत्तीमुळे केकेआरकडे अतिरिक्त आर्थिक जागाही उपलब्ध होऊ शकते, ज्याचा वापर संघ नव्या नेतृत्वासाठी करू शकतो. गेल्या काही हंगामांत केकेआरच्या कामगिरीत सातत्याचा अभाव दिसून आल्याने, नव्या कर्णधाराची निवड ही संघाच्या पुनर्बांधणीतील सर्वात महत्त्वाची पायरी मानली जात आहे.

आयपीएल २०२७च्या तयारीत आता केकेआरसमोरचा सर्वात मोठा प्रश्न म्हणजे ‘रहाणेनंतर संघाचे नेतृत्व कोण करणार?’ आणि त्याचे उत्तर आगामी लिलावात मिळण्याची शक्यता अधिक असल्याचे क्रिकेट तज्ज्ञांचे मत आहे.

हेही पहा –