प्रतिनिधी
मुंबईतील श्री सिद्धिविनायक गणपती मंदिरातील कथित देणगी अनियमिततेच्या चर्चेनंतर राज्य सरकारने या प्रकरणाची गंभीर दखल घेतल्याची माहिती समोर आली आहे. सूत्रांच्या माहितीनुसार, उपमुख्यमंत्री एकनाथ शिंदे यांनी मंदिरात गेल्या पाच वर्षांत प्राप्त झालेल्या सर्व देणग्यांचे विशेष लेखापरीक्षण (स्पेशल ऑडिट) करण्याचे निर्देश दिले आहेत. या निर्णयामुळे मंदिरातील आर्थिक व्यवहारांबाबत पुन्हा एकदा चर्चांना उधाण आले आहे.
मिळालेल्या माहितीनुसार, श्री सिद्धिविनायक गणपती मंदिर न्यासाचे अध्यक्ष तथा आमदार सदा सरवणकर यांनी नुकतीच उपमुख्यमंत्री एकनाथ शिंदे यांची भेट घेतली. या बैठकीत मंदिरातील देणग्या, आर्थिक व्यवहार आणि व्यवस्थापनासंदर्भातील विविध मुद्द्यांवर चर्चा झाली. त्यानंतर संपूर्ण आर्थिक व्यवहारांची सखोल तपासणी करण्यासाठी विशेष ऑडिटचे आदेश देण्यात आल्याचे सूत्रांचे म्हणणे आहे.
या विशेष लेखापरीक्षणात गेल्या पाच वर्षांत मंदिरात जमा झालेल्या रोख देणग्या, सोन्या-चांदीचे दागिने, मौल्यवान वस्तू आणि इतर स्वरूपातील अर्पणांचा तपशीलवार आढावा घेतला जाणार आहे. देणग्यांची नोंद, लेखा व्यवहार, दागिन्यांचा साठा, नोंदवही आणि संबंधित सर्व कागदपत्रांची पडताळणीही या प्रक्रियेत केली जाणार असल्याचे समजते.
(हेही वाचा – Paneer Ban : तुकाराम मुंढेंचा मोठा दणका! आर्टिफिशियल पनीरवर एका वर्षाची बंदी; थेट कारवाईचे आदेश )
सूत्रांच्या माहितीनुसार, ऑडिट प्रक्रिया निष्पक्ष आणि पारदर्शक पद्धतीने पूर्ण करण्याच्या सूचना संबंधित अधिकाऱ्यांना देण्यात आल्या आहेत. विशेष लेखापरीक्षणाचा अहवाल शासनाकडे सादर झाल्यानंतर पुढील निर्णय घेतला जाणार असल्याचेही सांगितले जात आहे.
याचबरोबर, या तपासणीत आर्थिक गैरव्यवहार, निधीचा अपहार, देणग्यांच्या नोंदींमध्ये तफावत किंवा इतर कोणतीही अनियमितता आढळल्यास संबंधितांवर कठोर कारवाई केली जाऊ शकते, अशी माहितीही सूत्रांकडून मिळत आहे.
देशातील सर्वाधिक देणग्या प्राप्त करणाऱ्या धार्मिक संस्थांमध्ये श्री सिद्धिविनायक मंदिराचा समावेश होत असल्याने, तेथील आर्थिक व्यवहार पूर्णपणे पारदर्शक राहावेत, अशी अपेक्षा भाविकांकडून सातत्याने व्यक्त केली जाते. त्यामुळे या विशेष लेखापरीक्षणाकडे राज्यभरातील भाविकांसह सर्वांचे लक्ष लागले आहे.
आता या विशेष ऑडिटमधून नेमकी कोणती तथ्ये समोर येतात आणि त्यानंतर शासन कोणते निर्णय घेते, याकडे सर्वांचे लक्ष लागून राहिले आहे.
हेही पहा –
Join Our WhatsApp Community