India vs Sri Lanka Cricket : भारतीय खेळाडूंच्या दुखापती पाहता, बीसीसीआयने फीजिओकडूनही मागितलं स्पष्टीकरण

• ऋजुता लुकतुके

India vs Sri Lanka Cricket : भारतीय क्रिकेटपटूंमध्ये वाढत्या दुखापतींच्या पार्श्वभूमीवर भारतीय क्रिकेट नियामक मंडळ (BCCI) फिटनेस चाचण्यांच्या निकषांमध्ये मोठे बदल करण्याच्या तयारीत असल्याचं समजतंय. इंग्लंड दौऱ्यात वारंवार झालेल्या दुखापतींनंतर बंगळुरू येथील सेंटर ऑफ एक्सलन्स (CoE) आणि BCCI च्या वैद्यकीय विभागाने फिटनेस मूल्यांकनाची संपूर्ण पद्धत बदलण्याचा किंवा सध्याच्या पद्धतीचा फेरआढावा घेण्याचा निर्णय घेतला आहे.

सध्या खेळाडूंच्या फिटनेस चाचण्या वैयक्तिक गरजांनुसार घेतल्या जातात. मात्र या पद्धतीमुळे एकसमान निकष नसल्याने खेळाडूंच्या फिटनेस पातळीचे अचूक मूल्यांकन करण्यात अडचणी येत असल्याचे BCCI ला वाटत आहे. त्यामुळे सर्व खेळाडूंसाठी समान फिटनेस मानके लागू करण्याचा विचार सुरू आहे.

ब्रॉन्को फिटनेस टेस्ट (Bronco Fitness Test) आणि दोन किलोमीटर धावण्याची चाचणी या दोन चाचण्यांना मूलभूत फिटनेस निकष म्हणून स्वीकारले जाऊ शकते. ब्रॉन्को चाचणी विशिष्ट वेळेत पूर्ण करणे बंधनकारक असणार असून, त्यासाठी ५.१५ ते ५.२० मिनिटांचा आधारभूत निकष निश्चित करण्याचा प्रस्ताव आहे. तसेच दोन किलोमीटर धावण्याची चाचणी ९ ते १० मिनिटांत पूर्ण करणे अपेक्षित असू शकते.

(हेही वाचा – Bhandara Crime : अवघ्या तीन वर्षांच्या चिमुकलीवर ३० वर्षीय नराधमांकडून अत्याचार; निषेधार्थ स्थानिकांकडून शहरात कडकडीत बंद!)

इंग्लंड दौऱ्यात अनेक खेळाडूंना दुखापतींचा सामना करावा लागला. विशेषतः जसप्रीत बुमराहच्या फिटनेसबाबत निर्माण झालेल्या परिस्थितीनंतर वैद्यकीय विभाग, फिजिओ आणि फिटनेस व्यवस्थापनाच्या कार्यपद्धतीवर प्रश्नचिन्ह उपस्थित झाले आहेत. त्यामुळे BCCI सपोर्ट स्टाफच्या कामगिरीचाही आढावा घेण्याची शक्यता व्यक्त केली जात आहे.

BCCI चे मत आहे की, एकसमान फिटनेस निकष लागू झाल्यास खेळाडूंच्या निवड प्रक्रियेत अधिक पारदर्शकता येईल आणि दुखापतींचे प्रमाण कमी करण्यास मदत होईल. तसेच राष्ट्रीय संघ, भारत अ संघ आणि देशांतर्गत क्रिकेट खेळणाऱ्या संभाव्य खेळाडूंसाठीही समान मानके लागू करण्याचा विचार सुरू आहे.

आगामी श्रीलंका कसोटी मालिका आणि पुढील आंतरराष्ट्रीय स्पर्धा लक्षात घेता BCCI लवकरच या संदर्भात अधिकृत निर्णय जाहीर करू शकते. भारतीय क्रिकेटमध्ये फिटनेस व्यवस्थापन अधिक शास्त्रीय आणि काटेकोर करण्याच्या दिशेने हा निर्णय महत्त्वाचा टप्पा ठरू शकतो, असे क्रिकेट तज्ज्ञांचे मत आहे.

हेही पहा –