Russia: रशियाची राजधानी मॉस्कोमध्ये एका रेस्टॉरंटजवळ झालेल्या स्फोटात तीन जण ठार आणि २१ जण जखमी झाले. रशियन अधिकाऱ्यांनी सांगितले की, शनिवारी संध्याकाळी मध्य मॉस्कोमधील एका उच्चभ्रू रेस्टॉरंटजवळ एका खाजगी कार्यक्रमादरम्यान हा स्फोट झाला. या स्फोटात बॉम्ब बाळगणाऱ्या एका महिलेचा मृत्यू झाला.
रशियन वृत्तसंस्था आरआयए नोवोस्त्स्कीचा हवाला देत रॉयटर्सने वृत्त दिले की, देशाच्या राष्ट्रीय दहशतवादविरोधी समितीने कळवले आहे की, एक अज्ञात महिला कुद्रिन्स्काया चौकातील ‘बाल्झी रोस्सी’ रेस्टॉरंटमध्ये प्रवेश करण्याचा प्रयत्न करत होती, परंतु तिला एका सुरक्षा रक्षकाने अडवले. त्या महिलेकडे एक तात्पुरते स्फोटक उपकरण (आयईडी) होते, जे रेस्टॉरंटमध्ये प्रवेश करण्यापूर्वीच फुटले. या स्फोटात ती महिला, तिला अडवणारा सुरक्षा रक्षक आणि एक ग्राहक ठार झाले.
हेही वाचा – Plane Crash : हसत-खेळत सहलीला निघाले खरे, पण तोच प्रवास ठरला अखेरचा; विमान दुर्घटनेत १३ जणांवर काळाचा घाला
रशियन अधिकाऱ्यांनी त्या महिलेची ओळख उघड केलेली नाही किंवा तिने असे कृत्य का केले याचे स्पष्टीकरणही दिलेले नाही. तिने जाणूनबुजून बॉम्बस्फोट घडवला की नाही हे अस्पष्ट आहे. सुरुवातीच्या माध्यमांच्या वृत्तानुसार हा स्फोट गॅस सिलेंडरचा होता, परंतु नंतर रशियन दहशतवादविरोधी समितीने तो एक आयईडी असल्याचे निश्चित केले. असे वृत्त एबीपी न्यूज ने दिले आहे.
रशियन व्यावसायिक वृत्तपत्र ‘कोमरसँट’मधील एका वृत्तानुसार, हा हल्ला रेस्टॉरंटच्या बाहेरील टेरेसवर एका खासगी कार्यक्रमात उपस्थित असलेल्या पाहुण्यांना लक्ष्य करून करण्यात आला होता. सूत्रांचा हवाला देत वृत्तपत्राने म्हटले आहे की, कार्यक्रमाच्या ठिकाणी कडक सुरक्षा व्यवस्था ठेवण्यात आली होती, अन्यथा मृतांचा आकडा खूप जास्त असू शकला असता.
हेही पहा –
Join Our WhatsApp Community