संरक्षण संशोधन संस्थेच्या (DRDO) संचालक पदावर काम करत असलेल्या प्रदीप कारुळकर यांना दहशतवादी विरोधी पथकाने कारवाई करत अटक केली आहे. डीआरडीओचे संचालक हे पाकिस्तानच्या इंटेलिजन्सच्या हनी ट्रॅपमध्ये अडकले होते. त्यानंतर पाकिस्तानच्या इंटेलिजन्स ऑपरेशनमध्ये सहभागी होऊन त्यांनी पाकिस्तानला माहिती पुरवल्याचा धक्कादायक प्रकार समोर आला आहे. यामुळे आता दहशतवादी विरोधी पथकाने संचालकवर मोठी कारवाई केली आहे.
या प्रकरणाची अधिक माहिती अशी आहे की, संरक्षण संशोधन संस्थेचे शास्त्रज्ञ यांनी पुणे येथील त्यांच्या कार्यालयामधून पाकिस्तान इंटेलिजन्स ऑपरेटिव्ह (PIO) चे हस्तक यांच्याशी सोशल मीडियाच्या माध्यमातून व्हॉटअपद्वारे व्हाईस मेसेज, व्हिडिओ कॉलने संपर्कात राहिले असल्याची माहिती ATS ला मिळाली होती. त्यासोबत डि. आर. डी. ओ. चे शास्त्रज्ञ पदाचा गैरवापर करत त्यांच्या ताब्यात असलेली संवेदनशील शासकिय माहिती पाकिस्तानला पुरवत असायचे. प्राथमिक अंदाजानुसार हनी ट्रॅपमध्ये सापडल्याने ते पाकिस्तानला माहिती देत असायचे असा संशय आहे. दहशतवाद विरोधी पथकाने ही कारवाई केली आहे.
हनीट्रॅपमध्ये अडकून त्यांनी संवेदनशील माहिती पाक इंटेलिजन्स ॲाफिसरला दिल्याचं स्पष्ट झालं आहे. निवृत्तीला सहा महिने राहिले असताना ते हनीट्रॅपमध्ये फसले. सहा महिने मोबाईलच्या माध्यमातून ते पाकच्या गुप्तचर यंत्रणेशी संबंधित असलेल्या महिलेच्या संपर्कात असल्याची माहिती आहे. त्यामुळे एटीएसने त्यांना अटक केली असून पुढील तपास सुरु आहे.
Join Our WhatsApp Community