यवतमाळ (Yavatmal) जिल्ह्यातून एक धक्कादायक प्रकरण समोर आले आहे. येथे उमरखेड येथील ‘अब्दुल गफूर शाह नगर परिषद उर्दू शाळा क्रमांक 2’ मध्ये प्रजासत्ताक दिनाच्या (Republic Day) कार्यक्रमादरम्यान कथितरित्या एक पाकिस्तानी गाणे वाजवण्यात आले. या गाण्यावर शाळेतील मुलांनी नृत्य केल्याचेही सांगितले जात आहे. प्रकरण उघडकीस आल्यानंतर परिसरात तणाव निर्माण झाला असून उमरखेड पोलिसांनी यासंदर्भात तक्रार नोंदवली आहे.
(हेही वाचा – Crime News : मथुरा येथे एकाच कुटुंबातील पाच जणांचे मृतदेह आढळून आल्याने खळबळ)
सोशल मीडियावर तलवार हातात घेऊन मुलांनी केलेल्या या नृत्याचा व्हिडिओ व्हायरल होत आहे. माहितीनुसार, २६ जानेवारी रोजीच्या सांस्कृतिक कार्यक्रमात ‘ऐ मर्द-ए-मुजाहिद तेरी ललकार क्या है’ हे गाणे वाजवण्यात आले होते. हे गाणे पाकिस्तानमध्ये सैन्याचा उत्साह वाढवण्यासाठी वापरले जाते.
स्थानिक भाजप (BJP) नेते गोपाळ काळाणे यांनी पोलिसांकडे तक्रार दाखल केली आहे. त्यांच्या म्हणण्यानुसार, हे एक जिहादी गाणे असून पाकिस्तानने 1965 च्या युद्धादरम्यान याचा वापर केला होता. काळाणे यांनी या प्रकाराला देशविरोधी कृत्य ठरवत शाळेच्या प्राचार्य व शिक्षकांविरुद्ध कठोर कारवाई आणि देशद्रोहाचा गुन्हा दाखल करण्याची मागणी केली आहे. सध्या पोलीस व्हिडिओची तपासणी करत असून शाळा प्रशासनाची चौकशी सुरू आहे. (Yavatmal)