US Iran tensions: इराणच्या अणुकार्यक्रमावरून अमेरिका आणि इराण यांच्यातील तणाव पुन्हा एकदा तीव्र झाला आहे. अमेरिकेचे उपराष्ट्राध्यक्ष जेडी व्हान्स (JD Vance) यांनी इराणला कठोर इशारा देत, “अणुकरारावर तोडगा न निघाल्यास अमेरिकेकडून पुन्हा लष्करी कारवाई होऊ शकते,” असे स्पष्ट केले आहे.
व्हाईट हाऊसमध्ये झालेल्या पत्रकार परिषदेत व्हान्स म्हणाले की, अमेरिका अजूनही राजनैतिक मार्गाने तोडगा काढण्यास प्राधान्य देत आहे. मात्र, इराणने अण्वस्त्र कार्यक्रम थांबवण्याबाबत ठोस हमी दिली नाही, तर “दुसरा पर्याय” म्हणून लष्करी मोहीम पुन्हा सुरू केली जाऊ शकते.
अमेरिकेचे माजी राष्ट्राध्यक्ष डोनाल्ड ट्रम्प यांनीही इराणला मुदत देत कठोर भूमिका घेतली आहे. इराणने अणुकार्यक्रमावर नियंत्रण आणण्यासाठी समाधानकारक करार न केल्यास “मोठा हल्ला” होऊ शकतो, असा इशाराही ट्रम्प यांनी दिला असल्याचे अमेरिकन माध्यमांनी म्हटले आहे.
जेडी व्हान्स यांनी स्पष्ट केले की, “अमेरिकेची मुख्य अट म्हणजे इराणने भविष्यात अण्वस्त्रे विकसित न करण्याची हमी द्यावी.” अमेरिकेला मध्यपूर्वेत आणखी मोठे युद्ध नको आहे, पण इराणने अणुशक्ती वाढवण्याचा प्रयत्न केल्यास अमेरिकेकडे सर्व पर्याय खुले आहेत, असेही त्यांनी सांगितले.
दरम्यान, इराणनेही अमेरिकेच्या दबावाला झुकणार नसल्याचे संकेत दिले आहेत. इराणी अधिकाऱ्यांनी “नव्या संघर्षाच्या आघाड्या उघडू शकतात” असा इशारा देत अमेरिकेच्या धमक्यांना प्रत्युत्तर दिले. त्यामुळे मध्यपूर्वेतील परिस्थिती आणखी चिघळण्याची शक्यता व्यक्त केली जात आहे.
या संघर्षाचा परिणाम जागतिक अर्थव्यवस्थेवरही दिसू लागला आहे. होर्मुझ सामुद्रधुनीतील तणावामुळे तेलाच्या किमती वाढल्या असून, आंतरराष्ट्रीय बाजारपेठा सावध झाल्या आहेत. अमेरिका-इराण संघर्ष आणखी वाढल्यास ऊर्जा पुरवठा आणि जागतिक व्यापारावर मोठा परिणाम होऊ शकतो, अशी भीती व्यक्त होत आहे.
हेही वाचा: इंधन तुटवड्याबद्दल CM Devendra Fadnavis यांनी सांगितले सत्य; म्हणाले, राज्यात…
Join Our WhatsApp Community