India – US Trade Deal : भारत, अमेरिका व्यापारी कराराच्या चर्चेला वेग, पुढील आठवडा महत्त्वाचा

• ऋजुता लुकतुके

India – US Trade Deal : भारत आणि अमेरिका यांच्यातील बहुप्रतिक्षित व्यापार कराराच्या चर्चांना पुन्हा गती मिळाली असून पुढील आठवड्यात दोन्ही देशांदरम्यान महत्त्वपूर्ण बैठका होणार आहेत. या बैठकींमध्ये अंतरिम व्यापार कराराला अंतिम स्वरूप देण्यावर भर असणार असल्याची माहिती समोर आली आहे. (India – US Trade Deal)

केंद्रीय वाणिज्य सचिव राजेश अगरवाल यांनी दिलेल्या माहितीनुसार, अमेरिकेचे व्यापार प्रतिनिधी जेमिसन ग्रीर (Jamieson Greer) २३ आणि २४ जून रोजी भारत दौऱ्यावर येणार आहेत. या दौऱ्यात दोन्ही देशांमधील प्रलंबित मुद्द्यांवर चर्चा करून कराराला अंतिम रूप देण्याचा प्रयत्न केला जाईल. (India – US Trade Deal)

भारत आणि अमेरिका गेल्या अनेक महिन्यांपासून द्विपक्षीय व्यापार करारावर चर्चा करत आहेत. दोन्ही देशांमध्ये बाजारपेठेतील प्रवेश, आयात शुल्क, वस्त्रोद्योग, पोलाद आणि कृषी उत्पादनांशी संबंधित काही मुद्द्यांवर अजूनही चर्चा सुरू आहे. तथापि, बहुतांश मुद्द्यांवर सहमती झाल्याचे संकेत दोन्ही बाजूंनी दिले आहेत. (India – US Trade Deal)

(हेही वाचा – Gold Silver Price Today 16 June 2026: सोन्या-चांदीचे भाव वधारले, तुमच्या शहरात 10 ग्रॅमचा भाव काय?)

अमेरिकेचे राष्ट्राध्यक्ष डोनाल्ड ट्रंप (Donald Trump) आणि पंतप्रधान नरेंद्र मोदी (PM Narendra Modi) यांच्यात जी-७ परिषदेदरम्यानही व्यापार कराराचा मुद्दा चर्चेत येण्याची शक्यता आहे. दोन्ही नेते व्यापारासोबतच व्हिसा धोरण, ऊर्जा सहकार्य आणि गुंतवणूक यांसारख्या विषयांवरही चर्चा करू शकतात. (India – US Trade Deal)

या करारामुळे भारतीय निर्यातदारांना अमेरिकन बाजारपेठेत अधिक सुलभ प्रवेश मिळू शकतो. विशेषतः वस्त्रोद्योग, औषधनिर्मिती, अभियांत्रिकी वस्तू आणि तंत्रज्ञान क्षेत्राला याचा मोठा फायदा होण्याची अपेक्षा आहे. त्याचबरोबर अमेरिकेलाही भारताच्या वाढत्या बाजारपेठेत अधिक संधी उपलब्ध होऊ शकतात. (India – US Trade Deal)

केंद्रीय वाणिज्य मंत्री पीयूष गोयल (Piyush Goyal) यांनी यापूर्वी सांगितले होते की, कराराच्या पहिल्या टप्प्याबाबत बहुतांश चर्चा पूर्ण झाली असून आता केवळ काही तांत्रिक बाबींची पूर्तता बाकी आहे. त्यामुळे जुलैच्या मध्यापर्यंत कराराच्या पहिल्या टप्प्याची घोषणा होण्याची शक्यता व्यक्त केली जात आहे. (India – US Trade Deal)

दरम्यान, जागतिक अर्थव्यवस्थेतील अनिश्चितता, मध्यपूर्वेतील घडामोडी आणि पुरवठा साखळीतील बदलांच्या पार्श्वभूमीवर भारत-अमेरिका व्यापार कराराला विशेष महत्त्व प्राप्त झाले आहे. हा करार अंतिम झाल्यास दोन्ही देशांमधील आर्थिक संबंधांना नवी दिशा मिळण्याची अपेक्षा व्यक्त केली जात आहे. (India – US Trade Deal)

हेही पहा –