Operation Sindoor मुळे अस्वस्थ पाकिस्तानने काश्मीरच्या सीमेवर केला गोळीबार; १५ निष्पाप नागरिकांचा मृत्यू

पहलगाम येथे पाकपुरस्कृत दहशतवादी हल्ल्यानंतर भारताने ऑपरेशन सिंदूरच्या (Operation Sindoor) माध्यमातून पाकिस्तानातील दहशतवाद्यांची ९ ठिकाणे उद्ध्वस्त केली. त्यामुळे अस्वस्थ झालेल्या पाकिस्तानने जम्मू-काश्मीरच्या सीमेवर गोळीबार करणे सुरु केले आहे. या हल्ल्यात १५ निष्पाप नागरिकांचा मृत्यू झाला तर ४३ जण जखमी झाले. पूंछ आणि तंगधार येथे हा गोळीबार केला. पाकिस्तान पूंछ आणि आसपासच्या भागात नियंत्रण रेषेवर सतत शस्त्रसंधीचे उल्लंघन करत आहे आणि गोळीबार करत आहे.

पूंछमधील केंद्रीय गुरुद्वारा श्री गुरु सिंह सभा साहिबवर पाकिस्तानी सैन्याने बॉम्बहल्ला केला, ज्यामध्ये तीन शीख बांधवांचा मृत्यू झाला. त्यात रग्गी सिंग भाई अमरिक सिंग, सैनिक भाई अमरजीत सिंग आणि दुकानदार भाई रणजीत सिंग. मानकोट परिसरात शीख महिला बीबी रुबी कौर यांचाही मृत्यू झाला. या हल्ल्यात गुरुद्वाराच्या भिंतीचे नुकसान झाले आणि अनेक घरे जळून राख झाली. शेकडो लोक सुरक्षित ठिकाणी स्थलांतरित होत आहेत. हा हल्ला भारताच्या ‘ऑपरेशन सिंदूर’ला प्रत्युत्तर म्हणून करण्यात आला, ज्यामध्ये भारतीय सैन्याने पाकिस्तान आणि पीओकेमधील नऊ दहशतवादी तळांवर हवाई हल्ले केले. २२ एप्रिल २०२५ रोजी पहलगाममध्ये झालेल्या हिंदूंच्या हत्याकांडाचा बदला घेण्यासाठी हे हल्ले करण्यात आले आहेत. (Operation Sindoor)

(हेही वाचा Operation Sindoor : हल्ल्यानंतर पाकिस्तानी सैन्य आणि सत्ताधारी संभ्रमित)

पंजाबचे माजी उपमुख्यमंत्री आणि शिरोमणी अकाली दलाचे नेते सुखबीर सिंग बादल यांनी या हल्ल्याचा तीव्र निषेध केला. शीख नेहमीच राष्ट्राची तलवार राहिले आहेत. आम्ही आमच्या सशस्त्र दलांसोबत खडकासारखे उभे आहोत, असे त्यांनी सोशल मीडियावर म्हटले आहे. त्यांनी शहीदांच्या कुटुंबियांना भरपाई आणि सन्मान देण्याची मागणी केली. सुखबीर म्हणाले की, शिरोमणी अकाली दल शोकग्रस्त कुटुंबांसोबत उभा आहे आणि शांतीसाठी प्रार्थना करतो. त्यांनी इशारा दिला की जर शत्रूने सन्मानाला आव्हान दिले तर शीख त्यांचे देशभक्तीचे कर्तव्य पार पाडतील. (Operation Sindoor)

श्री अकाल तख्त साहिबचे कार्यवाहक जथेदार ज्ञानी कुलदीप सिंह गर्गज यांनीही या हल्ल्याचा निषेध केला. ते म्हणाले, हा केवळ गुरुद्वारावरील हल्ला नाही तर मानवतेवरील हल्ला आहे. त्यांनी भारत आणि पाकिस्तानला तणाव कमी करून शांततेसाठी पावले उचलण्याचे आवाहन केले. जथेदार म्हणाले, युद्ध निरपराधांना गिळंकृत करते. शांतता ही कमकुवतपणा नाही तर एक शक्ती आहे. त्यांनी सीमावर्ती लोकांना एकमेकांना पाठिंबा देण्याचे आणि गुरबानीवर विश्वास ठेवण्याचे आवाहन केले. पाकिस्तानच्या गोळीबाराला भारतीय सैन्याने योग्य प्रत्युत्तर दिले, ज्यामध्ये अनेक पाकिस्तानी सैनिक मारले गेल्याचे वृत्त आहे. या घटनेमुळे दोन्ही देशांमधील तणाव आणखी वाढला आहे.