Organ Donation ला नवीन दिशा; गरजू रुग्णांना नवजीवन देण्याचा संकल्प

• प्रतिनिधी 

अवयवदान (Organ Donation) आणि प्रत्यारोपणाच्या प्रक्रियेला अधिक गती मिळावी, ती पारदर्शक आणि प्रभावी व्हावी, यासाठी राज्य सरकार मोठी पावले उचलत आहे. यामुळे गरजू रुग्णांना नवीन जीवन मिळेल, अशी माहिती आरोग्यमंत्री प्रकाश आबिटकर यांनी दिली. मुंबईतील आरोग्य भवन येथे झालेल्या बैठकीत त्यांनी याबाबत सविस्तर माहिती दिली.

या बैठकीला आमदार देवयानी फरांदे, सार्वजनिक आरोग्य विभागाचे सचिव डॉ. निपुण विनायक, आरोग्य सेवा संचालक डॉ. नितीन अंबाडेकर, वैद्यकीय शिक्षण सहसंचालक डॉ. पल्लवी सापळे, वैद्यकीय अधिकारी, अवयव प्रत्यारोपणाचे तज्ज्ञ आणि विधी व न्याय विभागाचे अधिकारी उपस्थित होते.

(हेही वाचा – Pahalgam Terror Attack : हल्ल्याच्या ठिकाणी एकही सैनिक का नव्हता; सामाजिक माध्यमांवर होत आहे चर्चा)

नव्या सुविधा आणि सोयी

आरोग्यमंत्र्यांनी सांगितले की, अवयवदान (Organ Donation) आणि प्रत्यारोपण प्रक्रिया अधिक सुलभ व्हावी यासाठी अमरावती, कोल्हापूर, नाशिक आणि सोलापूर येथे नवीन प्रादेशिक अवयव प्रत्यारोपण समन्वय केंद्रे (ZTCC) सुरू केली जाणार आहेत. तसेच, सरकारी रुग्णालयांमध्ये अवयव पुनर्प्राप्ती केंद्रे (NTORC) उभारली जाणार असून, तिथे समन्वयक नेमले जातील. रुग्णालयांची नोंदणी प्रक्रिया लवकर पूर्ण करण्याचा निर्णयही घेण्यात आला आहे.

जिवंत व्यक्तीने अवयवदान (Organ Donation) करण्याची परवानगी मिळवण्याची प्रक्रिया आता अधिक सोपी होणार आहे. यासाठी विभागीय प्राधिकरण समित्या (RAC) काम करणार आहेत. तसेच, अत्यंत तातडीच्या परिस्थितीत अवयवदान आणि शवविच्छेदन प्रक्रियेत समन्वय राहावा यासाठीही सुधारणा केल्या जाणार आहेत, असे आरोग्यमंत्र्यांनी स्पष्ट केले.

(हेही वाचा – IPL 2025, MI vs SRH : सनरायझर्स हैद्राबादला नमवत मुंबई तिसऱ्या स्थानावर, रोहितही फॉर्ममध्ये परतला)

डॉक्टर आणि समन्वयकांसाठी प्रशिक्षण

अवयव प्रत्यारोपणाच्या क्षेत्रात डॉक्टरांचे कौशल्य वाढावे यासाठी त्यांच्यासाठी विशेष कार्यशाळा आयोजित केल्या जाणार आहेत. तसेच, समन्वयकांनाही प्रशिक्षण दिले जाईल. याशिवाय, ‘फेलोशिप इन क्रिटीकल मेडीसीन’ हा विशेष अभ्यासक्रम वैद्यकीय शिक्षण विभागामार्फत लवकरच सुरू होणार आहे, अशी माहिती आरोग्यमंत्र्यांनी दिली.

(हेही वाचा – Chhattisgarh मध्ये सुरक्षा दलाने नक्षलवाद्यांना घेरलं ; ५ नक्षलवादी ठार)

जनजागृती आणि सन्मान

अवयवदानाबाबत (Organ Donation) लोकांमध्ये सकारात्मक दृष्टिकोन निर्माण व्हावा यासाठी राज्यभर जनजागृती मोहीम राबवली जाणार आहे. यामुळे लोकांमध्ये अवयवदानाबाबत जागरूकता वाढेल आणि अधिक लोक यात सहभागी होतील, असा विश्वास आरोग्यमंत्र्यांनी व्यक्त केला. विशेष बाब म्हणजे, १ मे या महाराष्ट्र दिनी प्रत्येक जिल्ह्यात अवयवदाते आणि त्यांच्या कुटुंबीयांचा पालकमंत्री आणि जिल्हाधिकारी यांच्या हस्ते सत्कार केला जाणार आहे.

राज्य सरकारचे उद्दिष्ट आहे की, अवयवदान (Organ Donation) आणि प्रत्यारोपण प्रक्रिया सुलभ आणि पारदर्शक करून जास्तीत जास्त गरजू रुग्णांना नवजीवन द्यावे. यासाठी कार्यक्षम यंत्रणा उभारण्यावर भर दिला जात आहे. आरोग्यमंत्र्यांच्या मार्गदर्शनाखाली याबाबत सातत्याने काम सुरू आहे आणि येत्या काळात याचे चांगले परिणाम दिसतील, असा विश्वास व्यक्त केला जात आहे. अवयवदानाला प्रोत्साहन देऊन गरजू रुग्णांना नवजीवन देण्यासाठी राज्य सरकार पूर्णपणे कटिबद्ध आहे, असे आरोग्यमंत्री प्रकाश आबिटकर यांनी ठामपणे सांगितले.

हेही पहा –