ठाकरे बंधू एकत्र आल्यास आनंदच; CM Devendra Fadnavis यांची सकारात्मक प्रतिक्रिया

• प्रतिनिधी

मनसे अध्यक्ष राज ठाकरे आणि शिवसेना (उबाठा) प्रमुख उद्धव ठाकरे एकत्र येण्याच्या चर्चांवर मुख्यमंत्री देवेंद्र फडणवीस (CM Devendra Fadnavis) यांनी सकारात्मक प्रतिक्रिया दिली आहे. “जर राज आणि उद्धव ठाकरे हे बंधू आपापसातील मतभेद विसरून एकत्र येत असतील, तर आम्हाला आनंदच आहे. यात वाईट वाटण्याचे कोणतेही कारण नाही,” असे मुख्यमंत्री फडणवीस म्हणाले. तथापि, त्यांनी आगामी मुंबई महापालिका आणि स्थानिक स्वराज्य संस्थांच्या निवडणुकांमध्ये भाजपाच्या नेतृत्वाखालील महायुतीच विजयी होईल, असा विश्वासही व्यक्त केला.

राज ठाकरे यांनी उद्धव ठाकरे यांना एकत्र येण्याची साद घातली असून, उद्धव यांनी सकारात्मक प्रतिसाद देत भाजपाला पाठिंबा न देण्याची अट ठेवली आहे. या पार्श्वभूमीवर मुख्यमंत्री फडणवीस (CM Devendra Fadnavis) यांनी सूचक वक्तव्य केले, “एकाने साद दिली, दुसऱ्याने प्रतिसाद दिला, पण शर्तीही ठेवल्या आहेत. त्यावर मी काय बोलणार? त्यांनाच विचारा. प्रसारमाध्यमांतच यावर जास्त विचारमंथन सुरू आहे.” ठाकरे बंधूंची एकजूट महाराष्ट्राच्या राजकारणात मोठे बदल घडवू शकते, पण महायुतीच्या विजयावर मुख्यमंत्री फडणवीस (CM Devendra Fadnavis) ठाम आहेत.

(हेही वाचा – Bhagwati Hospital च्या खासगीकरणावर केंद्रीय मंत्री पीयूष गोयल यांनी सूचवला नवा पर्याय; जाहिरात रद्द करण्याचे दिले निर्देश)

ठाकरे कुटुंबाच्या एकजुटीला रोहित पवारांचे समर्थन

राष्ट्रवादी काँग्रेस (शरद पवार गट) आमदार रोहित पवार (Rohit Pawar) यांनी ठाकरे कुटुंबाच्या संभाव्य एकजुटीचे स्वागत करत मराठी अस्मितेसाठी सर्व कुटुंबांनी एकत्र येण्याचे आवाहन केले आहे. सोशल मीडियावर पवार म्हणाले, “मराठी अस्मितेला नख लावू पाहणाऱ्या महाराष्ट्रद्रोही शक्तीच्या विरोधात ठाकरे कुटुंब एकत्र येत असेल, तर मराठी मनासाठी हा सुवर्णक्षण असेल. केवळ ठाकरे कुटुंबानेच नाही, तर सर्वच कुटुंबांनी महाराष्ट्रधर्म जपण्यासाठी एकत्र यायला हवे. यातच महाराष्ट्राचे हित आहे.”

मनसे अध्यक्ष राज ठाकरे यांनी उद्धव ठाकरे यांना एकत्र येण्याची साद घातली असून, उद्धव यांनी सकारात्मक प्रतिसाद देत भाजपाला पाठिंबा न देण्याची अट ठेवली आहे. या पार्श्वभूमीवर रोहित पवार (Rohit Pawar) यांनी शरद पवार आणि अजित पवार यांना टॅग करत पवार कुटुंबाच्या एकजुटीचे सूचक संकेत दिले. राष्ट्रवादीत फूट पडल्यानंतर पवार कुटुंबाच्या एकत्र येण्याच्या चर्चांना त्यांच्या वक्तव्याने बळ मिळाले आहे. ठाकरे आणि पवार कुटुंबांचे महाराष्ट्राच्या राजकारणातील वजन लक्षात घेता, ही एकजूट आगामी मुंबई महापालिका आणि स्थानिक स्वराज्य संस्थांच्या निवडणुकांवर परिणाम करू शकते. रोहित पवार (Rohit Pawar) यांच्या आवाहनाने मराठी अस्मितेचा मुद्दा प्रामुख्याने तापण्याची शक्यता आहे. त्यांच्या या वक्तव्याने राजकीय मतभेद बाजूला ठेवून मराठी हितासाठी एकजुटीचे महत्त्व अधोरेखित झाले आहे.

हेही पहा –