Apple जगभरातील तंत्रज्ञान क्षेत्रात कर्मचारी कपातीचे सत्र सुरू असताना आता अॅपलनेही पुन्हा कर्मचारी कपात केली आहे. ब्लूमबर्गच्या वृत्तानुसार, अॅपलने गेल्या आठवड्यात Fitness+ टीममधील काही कर्मचाऱ्यांना कामावरून कमी केले. गेल्या दोन महिन्यांपेक्षा कमी कालावधीत अॅपलने केलेली ही दुसरी कर्मचारी कपात आहे.
या कपातीचा फटका Fitness+ सेवेच्या ऑडिओ विभागात काम करणाऱ्या कर्मचाऱ्यांना बसला आहे. यामध्ये ‘Time to Walk’ आणि ‘Time to Run’ यांसारख्या सुविधांवर काम करणाऱ्या कर्मचाऱ्यांचाही समावेश आहे. या सुविधांच्या माध्यमातून अॅपल वॉच वापरणाऱ्यांना व्हिडीओ न पाहता व्यायाम आणि चालण्यासंदर्भातील ऑडिओ कंटेंट ऐकता येतो.
हेही वाचा – मंत्री Jaykumar Gore यांच्या एका विधानाने पुण्यात राजकीय खळबळ; महायुती टिकणार की स्वबळाचा नवा खेळ रंगणार?
या कपातीनंतर Fitness+ साठी नवीन ऑडिओ कंटेंट पूर्वीच्या तुलनेत कमी प्रमाणात प्रसिद्ध होण्याची शक्यता आहे. मात्र, ही सेवा सध्या बंद करण्यात येणार नसल्याचे वृत्तात म्हटले आहे.
Fitness+ म्हणजे काय?
Fitness + ही अॅपलची सबस्क्रिप्शनवर आधारित वर्कआउट सेवा आहे. अॅपल वॉच वापरणाऱ्या ग्राहकांसाठी मार्गदर्शित व्यायाम आणि फिटनेस कंटेंट उपलब्ध करून देणारी ही सेवा Peloton सारख्या कंपन्यांच्या सेवांना स्पर्धा देते.
ऑगस्टमध्येही २00 हून अधिक कर्मचाऱ्यांची कपात
Fitness+ मधील कर्मचारी कपातीपूर्वी ऑगस्टमध्येही अॅपलने विविध विभागांमध्ये कर्मचारी कपात केली होती. Siri, Vision Pro आणि Intelligent Systems Experience या विभागांमध्ये ही कपात करण्यात आली होती. Intelligent Systems Experience हा अॅपलच्या सॉफ्टवेअर इंजिनिअरिंग विभागाचा एक भाग असून, कंपनीच्या काही एआय सुविधांवर या टीमकडून काम केले जाते.
मागील कपातीमध्ये २०० हून अधिक कर्मचाऱ्यांवर परिणाम झाल्याचे वृत्त आहे. यामध्ये Vision Pro विभागातील सुमारे १०० पदांचा आणि Siri तसेच सॉफ्टवेअर टीममधील आणखी सुमारे १०० पदांचा समावेश होता.
त्यावेळी अॅपलने काही टीमची पुनर्रचना करून ग्राहकांना अधिक चांगला अनुभव देण्यासाठी व्यवसायात बदल केले जात असल्याचे म्हटले होते. कंपनीकडून नवीन पदे निर्माण केली जाणार असली तरी मर्यादित संख्येतील विद्यमान पदांवर परिणाम होणार असल्याचेही अॅपलने स्पष्ट केले होते.
हेही पहा –
Join Our WhatsApp Community