Yes bank Share Price : येस बँकच्या शेअरवर संशोधन संस्थांचा काय आहे अहवाल?

• ऋजुता लुकतुके

येस बँकेच्या शेअरमध्ये गेल्या महिन्यात अचानक हलचल निर्माण झाली. आधी स्टेट बँक (State Bank) या सरकारी बँकेनं कंपनीतील ४० टक्के हिस्सेदारी घेतली होती. ही चाल या बँकेला वाचवण्यासाठी होती. त्यानंतर आता एसएमबीसी (SMBC) या जपानी वित्तीय संस्थेनं स्टेट बँकेकडून त्यांच्या गुंतवणुकीतील २० टक्के हिस्सा खरेदी करण्याच्या हालचाली सुरू केल्या आहेत. या बातमीनंतर येस बँकेच्या शेअरने आपली मरगळ अचानक झटकली आहे. या व्यवहारामुळे बँकेला दीर्घकालीन धोरणात्मक भागीदार मिळणार असून, त्यांच्याकडे भक्कम बॅलन्स शीट आणि बँकेच्या वाढीसाठी भांडवली क्षमतेचा आधार असल्याचे मूडीजने नमूद केले आहे. (Yes bank Share Price)

एसएमबीस भारतातील येस बँकेत स्टेट बँक ऑफ इंडिया आणि अन्य सात खाजगी बँका – एचडीएफसी, आयसीआयसीआय बँक, कोटक महिंद्रा बँक, अ‍ॅक्सिस बँक, आयडीएफसी फर्स्ट बँक, फेडरल बँक आणि बंधन बँक – यांच्याकडून २०% हिस्सेदारी खरेदी करणार आहे. या बँकांनी मार्च २०२० मध्ये YES बँकेच्या पुनर्रचना टप्प्यात गुंतवणूक केली होती. एसएमबीसी २१.५० प्रति शेअर दराने १३,४८२ कोटीं रुपयांना ही हिस्सेदारी खरेदी करेल. (Yes bank Share Price)

या बातमीनंतर या शेअरमध्ये तेजी दिसून आली होती. पण, आता हा जोर ओसरला असून जून महिन्यात शेअर २० रुपयांच्या आसपास स्थिरावला आहे. आणि आठवडाभरात या शेअरमध्ये ३ टक्क्यांची किंवा ०.८० अंशांची घसरणच झाली आहे.

(हेही वाचा – Iran-Israel War : तणाव कमी झाला नाही तर कच्च्या तेलाचा भडका उडण्याची शक्यता?, तज्ज्ञ म्हणाले…)

अलीकडेच मनीकंट्रोल या वेबसाईटने सूत्रांच्या हवाल्याने दिलेल्या बातमीनुसार, येस बँकेने नवीन मुख्य कार्यकारी अधिकारी शोधण्याची औपचारिक प्रक्रिया सुरू केली आहे. बँकेच्या संचालक मंडळाने जागतिक हेडहंटिंग कंपनी एगॉन झेंडर यांची नियुक्ती केली आहे.

दुसरीकडे, काही ब्रोकरेज फर्म्सचा येस बँकेबाबत दृष्टिकोन अजूनही फारसा सकारात्मक नाही, कारण त्यांच्या मते, हिस्सेदारी खरेदी झाली तरी बँकेची मूलभूत स्थिती फारशी बदललेली नाही. ते म्हणतात, हा व्यवहार भावनिकदृष्ट्या सकारात्मक असला तरी मूलभूत बदल स्पष्ट नाही.

(हेही वाचा – Murti Visarjan : सार्वजनिक मंडळाच्या मोठ्या मूर्तींचे विसर्जन अशक्यच, नैसर्गिक तलावांसाठी समन्वय समिती आग्रही; शासनाला करणार सूचनांचा मसुदा सादर)

कोटक इन्स्टिट्युशनल इक्विटीजने आपल्या एका ताज्या टिपणामध्ये म्हटले की, YES बँकेच्या बिझनेस मॉडेलमध्ये काय बदल होणार आहेत यावर अजूनही स्पष्टता नाही. भागधारक कोण असणार हे स्पष्ट झाले असले, तरी बँकेच्या व्यवसायाच्या दृष्टीकोनात काही बदल झालेला नाही. (Yes bank Share Price)

“अशा उपाययोजना तेव्हाच सोप्या असतात जेव्हा समस्या एखाद्या एकाच संस्थेशी संबंधित असते आणि जेव्हा व्यापक आर्थिक परिस्थिती अनुकूल असते. मात्र, बहुतांश कर्जवाटप चक्र अनेक संस्थांना एकत्रितपणे प्रभावित करतात. लक्षात ठेवा की येस बँक अजूनही उद्योगाच्या सरासरी नफ्याच्या आणि वाढीच्या दरांपर्यंत पोहोचलेली नाही,” असे कोटकने नमूद करत शेअरवर ‘विक्री’ शिफारस दिली असून १७ चे लक्ष्य निर्धारित केलं आहे. (Yes bank Share Price)

(टीप – शेअर बाजारातील गुंतवणूक ही जोखमीची आहे. गुंतवणूकदारांनी आपल्या वैयक्तिक जबाबदारीवर गुंतवणूक करावी. हिंदुस्थान पोस्ट शेअरमधील खरेदी – विक्रीचा कुठलाही सल्ला देत नाही.)

हेही पहा –