केंद्रीय गृहमंत्री अमित शाह (Amit Shah) तीन दिवसांच्या महाराष्ट्र दौऱ्यावर येत असून, नागपूर, नांदेड आणि मुंबईत विविध महत्त्वाच्या कार्यक्रमांना ते उपस्थित राहणार आहेत. रविवारी रात्री नागपूरमध्ये आगमन झाल्यानंतर सोमवारी आणि मंगळवारी त्यांचा दौरा विविध शहरांमध्ये पार पडणार आहे. स्वातंत्र्यवीर सावरकरांच्या जयंतीच्या व्याख्यानापासून ते ऐतिहासिक मंदिराच्या जयंती महोत्सवापर्यंत अनेक ठिकाणी त्यांची उपस्थिती राहणार आहे.
नागपूर दौऱ्याला सुरुवात – वैद्यकीय आणि सुरक्षा प्रकल्पांच्या भूमिपूजनाला उपस्थिती
रविवारी रात्री साडेनऊ वाजता नागपूरमध्ये (Nagpur) दाखल झाल्यानंतर, अमित शाह (Amit Shah) सोमवारी सकाळी जामठा येथील नॅशनल कॅन्सर इन्स्टिट्यूट परिसरातील ‘स्वस्ति निवास पंथागार’ प्रकल्पाच्या भूमिपूजन कार्यक्रमात सहभागी होणार आहेत. त्यानंतर दुपारी १ वाजता चिंचोली येथील राष्ट्रीय न्यायवैद्यकीय विज्ञान विद्यापीठ (NFSC) च्या स्थायी परिषदेच्या इमारतीच्या भूमिपूजनात ते सहभागी होतील.
(हेही वाचा – Asia Cup 2025 : पाकिस्तानी संघाला क्रीडाविश्वातही धक्का बसणार?; केंद्रीय क्रीडा मंत्रालयाच्या निर्णयाकडे लक्ष)
नांदेडमध्ये इतिहास आणि रणनीतीचा संगम
सोमवारी दुपारी ३ वाजता शाह नांदेडमध्ये दाखल होतील. तिथे आनंदनगर येथे माजी मुख्यमंत्री वसंतराव नाईक (Vasantrao Naik) यांच्या प्रतिमेचे ते अनावरण करतील. त्यानंतर कुसुम ऑडिटोरियममध्ये प्रमुख पदाधिकाऱ्यांची बैठक घेणार असून, संध्याकाळी एक जाहीर सभा आयोजित करण्यात आली आहे.
मुंबईत सावरकर व्याख्यान आणि धार्मिक कार्यक्रमाची शान
सोमवारी रात्री ते मुंबईत दाखल होणार आहेत. मंगळवारी सर कावसजी जहांगीर सभागृहात स्वातंत्र्यवीर विनायक दामोदर सावरकर यांच्या ६० व्या जयंतीनिमित्त आयोजित व्याख्यानात ते मार्गदर्शन करणार आहेत. हे व्याख्यान राजकीय आणि ऐतिहासिक दृष्टिकोनातून महत्त्वाचे मानले जात आहे.
त्याच दिवशी, मुंबईच्या माधवबाग संकुलातील प्रसिद्ध श्री लक्ष्मी नारायण मंदिराच्या १५०व्या जयंती महोत्सवाला ते उपस्थित राहणार आहेत. या ऐतिहासिक आणि धार्मिक कार्यक्रमात मुख्यमंत्री देवेंद्र फडणवीस, मंत्री मंगलप्रभात लोढा आणि विधानसभा अध्यक्ष राहुल नार्वेकर देखील सहभागी होणार आहेत. मंदिराच्या दीर्घ परंपरेचा गौरव करणारा सांस्कृतिक कार्यक्रमही आयोजित करण्यात आला आहे.
राजकीय, सांस्कृतिक आणि सामाजिक दौऱ्याने महाराष्ट्रात उमटणार राजकीय सळसळ
अमित शाह (Amit Shah) यांचा हा दौरा केवळ शासकीय कार्यक्रमापुरता मर्यादित न राहता, आगामी राजकीय समीकरणांनाही गती देणारा ठरू शकतो, असे निरीक्षकांचे मत आहे. तीन शहरांतील ठळक उपस्थिती आणि विविध क्षेत्रांतील सहभागामुळे या दौऱ्याकडे राज्यभराचे लक्ष लागले आहे.
हेही पहा –
Join Our WhatsApp Community