ठाकरेंच्या ‘त्या’ खासदारांवर देशद्रोहाचा खटला दाखल करा; Naresh Mhaske यांची केंद्र सरकारकडे मागणी

शिवसेना (शिंदे गट) खासदार नरेश म्हस्के (Naresh Mhaske) यांनी उद्धव ठाकरे गटाच्या दोन खासदारांवर भारतीय लष्कराच्या ‘ऑपरेशन सिंदूर’ आणि सैन्याच्या पराक्रमाबाबत गैरसमज पसरवल्याचा गंभीर आरोप करत त्यांची चौकशी करून देशद्रोहाचा गुन्हा दाखल करण्याची मागणी केंद्र सरकारकडे केली आहे. मुंबईत आयोजित पत्रकार परिषदेत म्हस्के यांनी ठाकरे गटाच्या खासदारांवर पाकिस्तानी लष्कराचे प्रवक्ते बनल्याची जळजळीत टीका केली आणि त्यांच्या वक्तव्यांचा तीव्र निषेध व्यक्त केला.

खासदार नरेश म्हस्के (Naresh Mhaske) यांनी सांगितले की, गेल्या दोन दिवसांपासून संजय राऊत आणि अरविंद सावंत भारतीय लष्कराच्या कारवाईवर संशयास्पद वातावरण निर्माण करत आहेत. “या दोन्ही खासदारांच्या तोंडून पाकिस्तानी लष्कर आणि राज्यकर्त्यांची भाषा बाहेर पडत आहे. लष्कराने फोटो आणि व्हिडिओसह पुरावे सादर केले तरीही गैरसमज पसरवणे हा लष्कराचा अपमान आणि देशद्रोह आहे,” असा घणाघात त्यांनी केला.

म्हस्के (Naresh Mhaske) यांनी अरविंद सावंत यांच्या ‘गिरे तो भी टांग उपर’ या वक्तव्यावर तीव्र आक्षेप घेतला. “हे वक्तव्य कोणाला उद्देशून आहे? भारताच्या हवाई दलाचे वैमानिक आदेशाची वाट पाहत आहेत, त्यांचा हा अपमान नाही का? सावंत यांनी तात्काळ स्पष्टीकरण द्यावे,” असा इशारा त्यांनी दिला. तसेच, भारतीय लष्करावर विश्वास ठेवण्याऐवजी पाकिस्तानची भाषा बोलणाऱ्या ठाकरे गटाच्या खासदारांना त्यांनी खडेबोल सुनावले.

1971 च्या भारत-पाकिस्तान युद्धात भारताने विजय मिळवला, तरीही पाकिस्तानी वृत्तपत्रांनी पाकिस्तान जिंकल्याचा दावा केला होता, याची आठवण करून देत म्हस्के यांनी तत्कालीन पाकिस्तानी वृत्तपत्राची प्रत सादर केली. “त्या वेळी अटलबिहारी वाजपेयी आणि बाळासाहेब ठाकरे यांनी पंतप्रधान इंदिरा गांधी यांच्या भूमिकेला पाठिंबा दिला होता. आजही विरोधकांनी सरकार आणि लष्करावर विश्वास ठेवावा,” असे ते म्हणाले.

म्हस्के (Naresh Mhaske) यांनी 2006 च्या मुंबई लोकल ट्रेन बॉम्बस्फोट आणि 2008 च्या मुंबई दहशतवादी हल्ल्याचा उल्लेख करत राऊत यांना प्रश्न विचारला, “त्यावेळी इंदिरा गांधींची आठवण राऊत यांना का झाली नाही? पंतप्रधान मनमोहन सिंग असले तरी सूत्रे सोनिया गांधी चालवत होत्या. तेव्हा पाकिस्तानवर सर्जिकल स्ट्राइक का केला नाही?” राऊत यांनी सोनिया गांधींना हा प्रश्न विचारावा, अशी मागणी त्यांनी केली.

(हेही वाचा सलमा आणि साहिलने Operation Sindoor वरुन भारताच्या विरोधात केली आक्षेपार्ह पोस्ट; पोलिसांनी केली कारवाई)

भारतीय लष्कराच्या शौर्यावर संशय व्यक्त करणाऱ्या राऊत आणि सावंत यांना म्हस्के यांनी सणसणीत टोला लगावला. “राऊत यांना पाकिस्तानी लष्कराचे प्रवक्तेपद किंवा पाकिस्तानातील वृत्तपत्राचे संपादकपद हवे आहे का? आता त्यांनी रावळपिंडी किंवा लाहोरमधून खासदारकीची निवडणूक लढवावी,” असे संतप्त उद्गार त्यांनी काढले.

म्हस्के (Naresh Mhaske) यांनी ठामपणे सांगितले की, भारतीय लष्कर कोणत्याही पक्षाचे नाही, तर देशाचे आहे. “लष्करावर विश्वास ठेवणे प्रत्येक नागरिकाचे कर्तव्य आहे. राऊत आणि सावंत यांच्या वक्तव्यांचा प्रत्येकाने निषेध करावा. त्यांच्या वक्तव्यांची चौकशी करून कठोर कारवाई व्हावी,” अशी मागणी त्यांनी पुन्हा केली.

म्हस्के यांच्या या मागणीमुळे महाराष्ट्रातील राजकीय वातावरण तापले आहे. ठाकरे गट आणि शिंदे गट यांच्यातील वाद आणखी चिघळण्याची शक्यता आहे. राऊत आणि सावंत यांच्याकडून या आरोपांना काय प्रत्युत्तर येते, याकडे सर्वांचे लक्ष लागले आहे.

या पत्रकार परिषदेत म्हस्के (Naresh Mhaske) यांनी सहकार क्षेत्रातील मुद्द्यांवरही भाष्य केले. सहकार कायद्यात बदल आणि साखर कारखान्यांच्या उपपदार्थ निर्मितीवर त्यांनी भर दिला. तसेच, सहकारी बँकांमधील आधुनिकीकरण आणि गृहनिर्माण संस्थांच्या सक्षमीकरणाबाबतही त्यांनी सरकारच्या योजनांचा उल्लेख केला.

मुख्यमंत्री देवेंद्र फडणवीस यांच्या सहकार कायद्यातील बदलांच्या घोषणेला पाठिंबा देत म्हस्के यांनी सहकार चळवळीला नवीन दिशा मिळेल, अशी आशा व्यक्त केली. केंद्र शासनाच्या सहकार मंत्रालयाच्या प्रयत्नांमुळे ग्रामीण अर्थकारणाला चालना मिळत असल्याचेही त्यांनी नमूद केले.

खासदार नरेश म्हस्के (Naresh Mhaske) यांच्या या आक्रमक पत्रकार परिषदेने ठाकरे गटाच्या खासदारांविरोधात गंभीर आरोप करत राजकीय चर्चांना तोंड फोडले आहे. भारतीय लष्कराच्या शौर्यावर प्रश्न उपस्थित करणाऱ्या वक्तव्यांमुळे उद्भवलेला हा वाद आता काय वळण घेतो, हे पाहणे महत्त्वाचे ठरेल.